Музду тоңдуруу абдан чоң аракетти талап кылды

Нарын районуна караштуу Куланак айылында:көптү күттүргөн муз аянтчасы балдардын купулуна толуп,айыл тургундарынын эс алуусуна жакшы мүмкүнчүлүк түзүлүүдө

Кычыраган кыштын суугуна карабастан жаш жеткинчектердин, көк жылгаяк үстүндө ойноп жүргөндөрү

Жылгаякты иштетип жаткан Куланак айылынын тургуну Болдубек Абдыраимов байке бошобой жаткандыгына байланыштуу кызынан маалымат алууга туура келди.
-Мен Болдубек кызы Мырзайым Куланак айылынын тургуну болом. Биздин бул муз аянтчаны ачуубуздун себеби:атам күз мезгилинен бери ишке ашырууну ойлоп жүргөн. Мына эми ошентип бул күнгө да жеттик.

Жылгаякты тоңдуруу бизге абдан оор болду. Биринчиден атам жерди түздөп чыкты. Башында музду тоңдуруу абдан чоң аракетти талап кылды. Себеби кар жука болчу.

Азыркы учурда келип-кеткен кардарлардын саны көбөйүүдө . Жана ошондой эле айыл тургундарынын купулуна толуп,ыраазы болуп кетишүүдө-деп өз сөзүн аяктады . (каарманыбыз сүрөткө түшүүдөн баш тартты)
Андан соң биз эс алууга келген кыздардын бири менен маектештик.
-Саламатсыздарбы! Менин атым Болотбекова Айдайым. Азыркы учурда Абдылда Аралбаев атындагы орто мектебинин 8-классынын окуучусумун. Бүгүн биз классташ кыздар болуп, атайын сабактан кийинки убактыбызды бөлүп. Көк жылгаяктын үстүндө ойноого келгенбиз. Мага бул жер абдан жакты,купулга толоорлук экен. Муз аянтчасын айылдаштарым көпкө күтүшкөн. Мына эми ушинтип ачылып кубаныч тартуулоодо. Жана биздей болгон окуучуларга жакшы шарт түзүлүп, бош убактыларында келип жылгаяк тээп кетишүүдө-деп Айдайым өз сөзүн аяктады.

Айылдан алыска барбай эле саатына 50сомдон төлөп, ойноп кетип жаткан айыл тургундарына абдан жакшы шарт түзүлгөн экен.
Даярдагандар: Кылычбекова Эркеайым
Эрнисбек кызы Сайкал

Жаш жеткинчектин максаты

Кыргызстан боюнча түп көтөрүлүп, “китеп окуу жаркын келечек” — деп чакырык кылган жаштардын арасына Куланак айылы да кадам таштады. Бул долбоорго жетекчилик кылган айылдын жаш тургуну Адамис Таалайбеков менен маек курдук

А.Аралбаев атындагы орто мектебин 9 класска чейин окуп кеткен Адамис 2001 – жылы Куланак айылында төрөлгөн. Үй бүлөөдө беш биртууган, үч байкеси бир иниси бар. Атасы Дөөлөтбаев Таалайбек, апасы Абдырахманова Жаңылбүбү. Адамистин долбоорго кантип келип калышын өз оозунан уксак.

Мектепти 9-класска чейин окуп, аяктап Нарын шаарындагы эки жылдык мөөнөттөгү Нарын медресесине окууга тапшырдым. Нарын медресесинин 1-курсун жакшы жетишкендиктер менен бүтүп, Бишкек шаарындагы Байтил академиясынын 1-курсуна которулуп азыркы учурда окуумду академияда улантып жатам
Менин бул “Бир адамдан бир китеп” долбоорун Куланак айылына уюштуруума түрткү болгон “Нарын медресеси” жана учурда окуп жаткан “Байтил” академиясы. Себеби бул окуу жайларда мага сабак берген агайларым жана бизге жол көрсөткөн Нарын облосунун казысы Мамбетасан Ибраев агайым мага эң мыкты үлгү болуп тийгизген таасири жана “Эмне үчүн китеп окушубуз керек” атту китеби менин китепке болгон мамилемди өзгөртүп, көзүмдү ачты, жана кызыгуумду өрчүттү.

Ошондой эле ата энем, бир туугандарымдын колдоосу дем күч берди, менин китептерди көп окушума түрткү болду. Өзүм эле китеп окуубастан жалпы элди китеп окууга чакыруу максатында жана азыркы күндөгү эң курч көйгөйлөрдүн бири болгон китеп окуу маданиятынын жоктугун жана балдардын китептен алыс өсүшүн жоюу, келечек муунга жол көрсөтүү.


мектеп окуучуларына кулактандыруу кылып жаткан учур

21 – кылым технологиянын кылымы болуп жаткан учурда, китеп окуунун кажети барбы?
Азыркы учурда китептин ордун мультимедиялык, технологиялык каражаттар ээлеп. Маалымат алуу булагы китеп эмес телевизор интернет болуп калды. Китеп цивилизациясы артка кетип , экран цивилизациясы күчүнө кирип, учурдун адамдары маалымат булагы катары интернетти, телевизорду же чөйрөсүндөгү адамдарды колдонуп жатат. Бирок алардан алынган маалымат көбүнчө учурда чындыкка дал келбестен , ушак түрүндөгү маалыматтар болуп саналып калышы мүмкүн. Башкача айтканда адамдын аң-сезимин өстүрө турган маалыматтар эмес, тескерисинче, адамдын оюн булгай турган «таштанды» маалыматтар болуп калды. Ал эми китеп окуу адамдын интелектисинин жана сезимдеринин толук кандуу өнүгүүсүнө жардам берет. Китепти көп окуган адам өз алдынча өнүгүү жана жөндөмдөрун туура колдонуунун жолдорун окубаган адамдарга караганда жакшы билет. Ал эми көп окубаган адамдын маданий тажрыйбасы аз болуп, тили гана жарды болбостон , аң сезими жана жашоого болгон коз карашы тайкы болуп калат. Эң жөнөкөй мисал, кичине балдардын жомок окуусун жана ошол эле жомокту экран аркылуу көрүүсүн салыштырсак, китептен алган пайданы экрандан ала албайт. Китеп окуган учурда баланын ой жугүртүүсү , фантазиясы өрчүйт. Ал эми экрандан көрүү баланын фантазиясын чектейт, даяр нерсеге көндүрөт.

Долбоорду ишке ашыруу үчүн кандай кадамдарды таштап жатасыз?

Бул долбоорду ишке ашыруу үчүн атайын топ түздүм. Ал топто азыркы учурда мектепте окуп жаткан классташым Жолдошбеков Назымбек жана чогу окуп 9-классты аяктап, учурда Нарын шаарында окуп жаткан класташтарым Сарыкулов Бектур жана Абакиров Турат болуп иш алып барып жатабыз. Бул долбоор Куланак айылында ишке ашат деп толук ишенебиз себеби мектеп мугалимдери жана окуучулар айыл жаштары жана жалпы эл толугу менен колдоого алды. Жеке эле айыл тургундары эмес айылдан сырткары шаарда жана башка жерлерде жашаган Куланак айылынын кулундары колдоо менен китептерди сатып алып берип жатышат жана ошондой эле спонсорлор катарга кошулуп китеп алып берип жатышат

Долбоордун жүрүшүн Куланак жалпыга маалымдоо каражаттары аркылуу маал маалы менен чагылдырып турууга аракет кылып турат. Жайылтуу максатында соц тармактарга кулактандыруулар жана кайырылуулар старт алды.

маектешкен: Айзат Түмөнбаева

Куланак айылы 16 күндүк акцияга активдүү катышты

Нарын районуна караштуу Куланак айылы: үй — бүлөлүк зомбулук, гендердик теңсиздик темаларында тегерек столдорду, кыска метраждуу фильмдерди, линейкаларды, түз эфирлерди уюштурууда активдүү катышышты

Жогоруда аталган саамалыктарды Куланак жамааттык мультимедиа борбору тарабынан жана жамааттык ЖМКлардын Бирлиги менен биргеликте ишке ашырды.

Алгач эле айыл өкмөтүндө «Аялдарга, кыздарга карата болгон зордук — зомбулук жана гендердик теңсиздикке каршы аракеттебиз» аттуу аталышта тегерек стол 14 — ноябрда болуп өттү

көптөгөн талкуулар жаралып, бир жылдык иш план иштелип чыкты

Андан жалпы ата — энелер чогулушунда «коргоо ордери» жөнүндө маалымат берилип, «Элеттик айымдар», «Сияпат», «Космос курган кыздар» аталышындагы видеолор 26 — ноябрда А.Аралбаев мектебинде көрсөтүлдү





28 — ноябрда Социалдык кызматкер Алмагүл Бейшеналиева, үй — бүлөлүк дарыгерлер тобунун мед айымы Гүлзамира Чүкүшова, мектептин тарбия иштери боюнча директордун орун басары Гулнур Солтобаева жана айылдык аялдар кеңешинин төрайымы Таалайгүл Токсобаева менен биргеликте фейсбук баракчасында түз эфир уюшулду

Posted by Куланак медиа on Thursday, November 28, 2019

Куланак жамааттык мультимедиа борбору А.Аралбаев атындагы орто мектебинде жайгашкандыктан кандай гана иш чаралар өтпөсүн кыска метраждуу видеолор көрсөтүлүп жатты.

Ал эми 12 — декабрда «Биз зомбулуксуз үй — бүлөдө, мектепте, коомдо жашаган келечек ээлерибиз» аттуу аталышта чакан линейка болуп өттү. Линейка окуучулар зомбулуктун түрлөрүн атап беришти. Мээге чабуул үчүн баштаганда эле видео ролик менен башталды


линейкада чакан ценка, ырлар окулду. Баарынан кызыгы кыздар ак кайың ырына бий бийлешип, бийдин аягында
«Мен зомбулуксуз жашагым келет
Али эрте жоолук салынганга» деген сөздөр менен бийлерин аякташты.

Акцияны өткөрүүдө таркатма материалдар жана видеолор үчүн Куланак жамааттык мультимедиа борбору демөөрчүлөргө ыраазычылык билдирет

даярдаган : Айзат Түмөнбаева

Нарын облусунун 42 айылында таза суу долбоору ишке кирет

Бүгүн, 10-декабрда Өкмөттүн Нарын облусундагы ыйгарым укуктуу өкүлчүлүгүндө Кыргыз Республикасынын Жогорку Кеңешинин агрардык саясат, суу ресурстары, экология жана регионалдык өнүктүрүү боюнча комитетинин көчмө жыйыны өткөрүлүп, анда Нарын облусунун аймагындагы ичүүчү суу маселесине байланышкан мыйзам долбоорлору талкууланды,бул тууралуу Нарын облустук ыйгарым укуктуу өкүлүнүн басма сөз кызматы билдирди.


Маалыматка караганда көчмө жыйынга Жогорку Кеңештин депутаттары: Нурбек Алибеков, Алмаз Акматов, Муктарбек Айнакулов, Абылкайыр Узакбаев, ошондой эле тиешелүү министрликтердин өкүлдөрү, Өкмөттүн Нарын облусундагы ыйгарым укуктуу өкүлү, жергиликтүү кеңештердин депутаттары, Нарын шаарынын мэри, акимдер, айыл өкмөт башчылары, суу пайдалануучулар ассоциацияларынын төрагалары катышты.

Күн тартибинде Нарын облусунун жергиликтүү жамааттарын ичүүчү суу менен камсыздоо жана тазалоочу курулмалардын абалы; “Нарын облусунда айылдарды ичүүчү суу менен камсыздоо жана санитарияны өнүктүрүү” долбоору боюнча Кыргыз Республикасынын жана Азия өнүктүрүү банкынын ортосундагы кредиттик макулдашуунун долбоорун талкуулоо жана башка маселелер каралды.

Комитеттин төрагасы Нурбек Алибеков Президенттин алдына койгон максаты 2024-жылга чейин Кыргызстандын бардык аймактарын таза суу менен камсыздоо болуп, анын негизинде жакшы иштер жүрүп жатканын, Жогорку Кеңештин комитетинин көчмө жыйынын жеринде өткөрүүнүн максаты Өкмөттүн таза сууга байланышкан долбоорлорун жеринде карап, эртерээк ратификациялоо, көйгөйлөрдү жеринде көрүп жана Азия өнүктүрүү банкынын долбооруна кирбей калган айылдарды киргизип, киргендерин эртелеп ишке ашырууга түрткү берүү экендигин билдирди.

Суу ресурстары боюнча мамлекеттик агенттигинин директору Көкүмбек Таштаналиев баяндамасында белгилегендей, Кыргыз Республикасынын Өкмөтүнүн “Биримдик. Ишеним. Жаратмандык” программасынын алкагында республиканын 24 шаарында жана 653 айылында таза суу, саркынды суу курулмаларын ондоп, калыбына келтирүү жана жаны курулмаларды куруу камтылган. Анын ичинде Нарын облусунун 42 айылы Азия Өнүктүрүү банкынын “Нарын облусунда айылдарды ичүүчү суу менен камсыздоо жана санитарияны өнүктүрүү” долбооруна киргизилип жатат. Долбоордун жалпы наркы 32,9 миллион долларды түзөт. Анын ичинде Азия Өнүктүрүү банкынын насыясы 13,7 миллион доллар, ал эми Азия Өнүктүрүү фондунун гранты 13,7 миллион доллар, ошондой эле Кыргыз Республикасынын Өкмөтүнүн кошумча каржылоосу 5,5 миллион доллар.

Көчмө жыйында ушул долбоорду ишке ашыруудагы көйгөйлүү жагдайлар, ошондой эле Европа өнүктүрүү банкы тарабынан каржыланып жаткан “Нарын шаарынын таза суу канализация системасын реконструкциялоо” долбоорун улантуудагы тоскоолдук жараткан факторлор жана суу маселесине байланышкан бир катар маселелер талкууланды.

Жогорку Кеңештин депутаттары айтылган маселелерди чечүүгө, ишти жылдырууга аракет жасалаарын билдиришти.
Автор: Дилде Шатанова

Нарын облусу боюнча көмүрдүн учурдагы баасы канча?

Кыш кылычын кармап босогодо турганда Нарын облусунун эли үчүн кышка даярдык көрүү маселеси негизги орунда болушу шарт. Ал эми 2019-2020-жылдын күз-кыш мезгилине облустун экономика тармагына жана калкына 97 миң 284 тонна көмүр отуну керектелээри болжолдонсо, анын 75 миң тоннасы калкка, 22 миң 284 тоннасы бюджеттик мекемелерге тартылат.

Бүгүнкү күндө бюджеттик мекемелерге көмүр тартуу иши Жумгал районунда 98 пайызга, калган райондордо жана Нарын шаарында 100 пайызга аткарылды.

Ал эми калкты көмүр отуну менен камсыздоо боюнча Нарын облусунун басма сөз катчысы билдиргендей,облустун аймагында 68 көмүр кампасы уюштурулган. Учурда 41 кампада 4636 тонна көмүр бар. Райондор боюнча алсак, Ак-Талаада 13 кампада 1236 тонна, Ат-Башыда 8 кампада 2330 тонна, Жумгалда 3 кампада 150 тонна, Кочкордо 5 кампада 3200 тонна, Нарын районунда 10 кампада 275 тонна, Нарын шаарында 2 кампада 145 тонна көмүр сатыкта турат. Мындан сырткары Нарын шаарында жеке ишкерлер тарабынан 9 соода түйүнүндө 332 тонна көмүр отуну бар.

Көмүрдүн бир тоннасынын баасы Ак-Талаада 2800-3000, Ат-Башыда 3500, Жумгалда 1800-2600, Кочкордо 3200, Нарын районунда 3600, Нарын шаарында 3500 сомдон болууда.

Тиешелүү кызмат адамдарынан түзүлгөн комиссия көмүр сатып жаткан жеке жактардын тараза, көрнөк-жарнактар сыяктуу керектүү жабдуулар менен камсыз болушун көзөмөлгө алууда.

“Өтүгү жокко өзүм барам, тону жокко салам айт” дегендей, эми Нарын жергесине күн жааса эле кыш түшөт.

Андыктан облусубуздун калкын кыш камылгасын эртерээк көрүп, көмүр отунун камдап алууга чакырабыз.

Автор: Дилде Шатанова

Усубалиевдин 100 жылдык мааракеси кичи мекени Кочкор районунда жыйынтыкталды

Бүгүн, 22-ноябрда Нарын облусунун Кочкор районунда көрүнүктүү мамлекеттик жана саясий ишмер Турдакун Усубалиевдин 100 жылдыгына арналган маданий иш чара өткөрүлүп, ага Кыргыз Республикасынын Премьер-министри Мухаммедкалый Абылгазиев катышты.

Нарын областынын ыйгарым укуктуу өкүлүнүн басма сөз кызматы билдиргендей салтанаттуу иш чаранын ачылышы Ж. Абдыкалыков атындагы маданият үйүндө өткөрүлдү.Турдакун Усубалиевдин өмүр жолу тууралуу документалдык фильм жана театрлаштырылган көрсөтүү менен башталды.

Мааракелик жыйынды ачкан Кочкор райондук мамлекеттик администрациясынын башчысы-аким Нурлан Керимкулов залкар инсандын мааракеси республикалык жана облустук деңгээлде жогорку уюшкандыкта өткөрүлүп, бүгүн кичи мекенинде жыйынтыкталып жаткандыгын белгиледи.


Салтанаттуу иш чарада куттуктоо сөзүн сүйлөгөн Премьер-министр Мухаммедкалый Абылгазиев Турдакун Усубалиевичтин улуулугун, келечек үчүн жасаган иштерин бийик баа берүү менен белгилеп, “Адамдын улуулугу анын жөнөкөйлүгүндө. Турдакун Усубалиев сыяктуу эмгек сиңирген ар бир адамдын салымы өз баасын алат. Ал элдин кызыкчылыгын баарынан жогору коюп, республиканын бардык жашоочуларын бириктире алган. Черчиллдин сөзү менен айтканда: «Саясатчы – шайлоодон шайлоого чейинки аралыкты ойлойт, ал эми мамлекеттик ишмер–жалпы элдин келечегин ойлойт». Турдакун Усубалиев ар дайым элдин келечегин ойлогон. Биз дагы ушундай принциптерди карманабыз»”,-деди.


Мындан кийин Кыргыз Республикасынын депутаттары Чыныбай Турсунбеков, Акылбек Жапаров, Т. Усубалиевдин замандашы Эмилбек Абакиров, Т. Усубалиевдин небереси Эрмек Усубалиев улуу инсаныбызды эскерип, анын асыл касиеттерине, артында калтырып кеткен эмгектерине токтолушту.

Салтанаттуу жыйындан кийин Кочкор айылында Турдакун Усубалиевдин музейинин жана эстелигинин курулушуна капсула салынды.

Турдакун Усубалиевдин 100 жылдык мааракесине карата Кочкор районундагы Көк-Жар орто мектебине залкардын ысымы ыйгарылып, ушул эле мектептин спорт жана жыйындар залынын, ашканасынын курулуш бүткөрүлгөн. Ошондой эле Өкмөт тарабынан райондун борборундагы “Чолпон” кинотеатрына 15 миллион сом бөлүнүп, капиталдык оңдоо иштери жүрүп жатат.

Автор: Дилде Шатанова

“Адамдын эне тили – анын жан тамыры”

Нарын районуна караштуу Абдылда Аралбаев атындагы орто мектебинде кыргыз тилинин 30 жылдыгына карата 1 айлык өткөрүлдү. Иш чаранын алкагында кыргыз тил мугалимдеринин күчү менен ар кандай ачык сабактар, линейкалар жана концерттик иш чаралар өткөрүлүп жатты

Аталган мектепте 7б классынын күчү менен даярдалган “Адамдын эне тили – анын жан тамыры” аталышта ачык линейка өткөрүлдү. Линейканын жүрүшүндө класстын балдары манас айтуу менен ачып беришти

Айдана: Менде болгону акыркы 500 сомум бар эле… Айылдан чыккан азамат!

Канчалык жашоосунда кыйын күндөр өтсө дагы, баардык тоскоолдуктарды жеңип, жашоосун көркө боегон адамдар аз эмес. Анысы кандай өз ийгилигине ишенип чет жердин дамын татып жүргөн кызыбыз Айдана менен маек курдук…

-Саламатсызбы? Өзүңүз тууралуу маалымат бере кетсеңиз?

-Менин атым Айдана Айбекова. 1998-жылы 26-мартта Нарын районуна караштуу Куланак айылында туулгам. Абдылда Аралбаев атындагы орто мектепти аяктагам.

-Мектеп учурундагы жетишкендиктериңиз тууралуу айтсаңыз?

-Мектепте окуп жүргөндө эле активдүү кыздардан болуп, сабакты жалаң “беш” деген баалар менен бүттүм. Окуу менен биргеликте мектептеги парламетинде да иштедим. Жана ошондой эле “Акмарал” бий тобунда дагы бийлеп көп ийгиликтерди жараттым десем да болот.


-Мектепти аяктаган соң, кайсыл жакка тапшырдыңыз?

-Мектепти аяктаган соң, “кайсыл жакка тапшырсам?”, деп көпкө ойлондум. Биринчи эле МВД академиясына тапшырдым. Ал жакка өткөндөн кийин, үйдө атам каршы чыкты: “кыз кишиге бул кесип туура келбей калат,” деди. Ошол себептен мен ал жактан кайра документтеримди алып кетүүгө туура келди.
Андан кийин мед академияга тапшырайын десем, “ал жакка акча менен өтөт же болбосо кызыл атестат керек” дегенинен ал жакка да тапшыра албай калдым. Анан Эл аралык Кувейт жөнүндө угуп, ошол жакка барууну чечтим. Кудай жалгап ал университет менин жашаган үйүмө дагы жакын жайгашкан экен. Бардым да, кесип тандоого келгенде өтө кыйналдым. Менежмент жагына тапшырып өттүм. Бирок ачыгын айтканда, келечекте кайсыл жумуш менен алектенээримди өзүм түшүнгөн жокмун. Бир жыл окуп ал кесип жакпай калды, бир жыл ичинде абдан кыйналдым. Себеби, ал жакта баардыгы арабча болгондуктан, үч жылдын ичинде толук үйрөнө алган жокмун.

-Сизди эмне өкүндүрөт?
Менин эмнеге жиним келди? “11-жыл жакшы окуп, ОРТдан жакшы балга жетишип анан ушул контракка тапшырдымбы” деп өзүмдү күнөөлү сезип, “ата-энемен акча сурабайын” деп кошумча жумуштарда иштеп жүрдүм.

Өлкөгө чыгууңузга ким түрткү берди?

Менин группалаш кызым бар эле Айгерим деген. Бир күнү өз сунушун айтып калды. “Чет жерге чыккың келбей элеби, Германияга бир программа менен кетирип атыптыр, бирок курс окушуң керек экен.

Анан?
Немец тилин үйрөнүшүң керек” деди. “Au Piar” деген программа экен. Анан ал айткан курсуна жазылдым. 1000 сом беришим керек эле, менде болгону акыркы 500 сомум бар эле, ошону берип калганын кийинчээрек берейин деп, болбой көгөрүп атып жазылып алдым. Курсту 3 ай окудум.

Ал жакта экзамен бердиңизби?

Кийин экзамен тапшырдым . Ал дагы өтө оор болду. Экзамен тапшырганга дагы 5миң сом акча төлөдүк, анын жыйынтыгы үч күндө чыкты. Үч күн мен үчүн тозокко айланды. Кийин үч күндөн кийин мага өттүң деген кат келди.
Алар мага Германиядан үй-бүлөө издей башташты. Бирок мага Россиялык үй-бүлөө туш келди алар 30-жылдан бери ошол Германияда жашашат экен, Германиянын жарандыгы болушуптур. 4 баласы бар, күйөөсү абдан жакшы жумушта иштейт, аялы балдары менен үйдө. Ал үй-бүлө мага өтө жакты, адамдарга кылган мамилеси сылык экен, мени өздөрүнүн кызындай мамиле жасашты. Эң кыйын болгон нерсе виза маселеси болду. Анткени виза тапшырганы барганда консуль жок экен, кайра бардым. Алар чакырып экзамен алам дешти. Бир немец киши экен, ал суроолорду берди. Мен немец тилин өтө жакшы билем деп айта албайм, бирок, билем анан ал киши менен маектешип бүткөндөн кийин “кете бер, биз сизге чалабыз” , деп койду. Бир жумадан кийин мага чалышты: “визаңызды келип алып кетиңиз” дешти. Визаны алгандан кийин, Германияга билет сатып алдым.

Ата-энеңиз менен коштошуу кыйын болсо керек?

Атам менен бир туугандарым менен коштошуп кеткенге дагы үлгүргөн жокмун. Нарынга барганга дагы жетишпей калдым
Учурдагы жаңылыктарыңыздан бөлүшсөңүз?
Азыр болсо курска барам немец тилине . Азыр болсо мен жөн гана тил үйрөнүп жер көрүп жатам келгениме алты айдан ашты ,алты айдын ичинде Францияга,Италияга,Тосканага,Чехияга,Австрияга бардым бул мамлекеттер мага аябай жакты.
Маегиңизге рахмат!

Маектешкен:Дилде Шатанова

“Адамдын эне тили – анын жан тамыры”

Нарын районуна караштуу Абдылда Аралбаев атындагы орто мектебинде кыргыз тилинин 30 жылдыгына карата 1 айлык өткөрүлдү. Иш чаранын алкагында кыргыз тил мугалимдеринин күчү менен ар кандай ачык сабактар, линейкалар жана концерттик иш чаралар өткөрүлүп жатты

даярдаган: Даткайым Орозакунова

Окуучулар үчүн жаңы мүмкүнчүлүк

даярдаган: Айзат Түмөнбаева